ENG
МК | 
ПРЕДГОВОР
Сакам да ви откријам нешто што верувам дека повеќето од вас не го знаат, а оние малкумина што го знаат, не се секогаш сигурни како да го применат.
А која сум јас па да ме слушате мене?
Јас сум само гласник, посредник, оној што ги носи вестите.
И не обвинувајте ме мене ако нешто од ова не ви се допадне или ви звучи неверојатно.
Исто така, не сум одговорна ни ако многу ви се допадне. А знам дека ќе ви се допадне.
Вестите се такви што подобри не можат ни да бидат.
На пример, кој не би сакал да дознае дека добил огромно наследство од некој пребогат роднина за кој не знаел ни дека постои? И дека остатокот од својот живот може да го помине во секакво изобилство?
Единствен услов за да го преземе наследството е да научи како да управува со него...
Што би направиле вие? Би се согласиле веднаш да научите сè што треба и да почнете нов живот или, пак, би биле скептични и, во најмала рака, би тргнале да го испитувате семејното стебло, за да се уверите дека сето тоа е вистина?
На кој било од овие два типа да му припаѓате, ви препорачувам да продолжите со читање.
Одиме по ред...
